«Барселона» ҳимоячиси Жюль Кунде Испания чемпионати доирасида «Реал»га қарши бўлиб ўтадиган «эл-класико»ни ўтказиб юбориши мумкин.

Diario AS нашрининг хабар беришича, француз футболчиси жума куни ҳам жамоавий машғулотларда иштирок этмаган. Унинг жароҳатидан тикланиш жараёни кутилганидан секинроқ кечмоқда.

Кунде «Бетис»га қарши учрашувда тўпиғидан жароҳат олган эди. Дастлаб футболчининг тезроқ сафга қайтишига умид қилинган, бироқ ҳозирги вазиятда унинг якшанба куни «Реал»га қарши майдонга тушиши деярли имконсиз бўлиб турибди.

Франциялик ҳимоячи Чемпионлар лигасида «ПСЖ»га қарши ўтказилган ва каталонияликларнинг 2:4 ҳисобидаги мағлубияти билан якунланган учрашувда ҳам иштирок этмаганди.

Маълумотларга кўра, Кунде ҳозирча машғулотларни жамоадан алоҳида давом эттирмоқда. У жума куни ҳам спорт залида индивидуал дастур асосида шуғулланган.

Қолаверса, «Барселона»нинг яна бир ҳимоячиси Эрик Гарсия ҳам жароҳат сабаб сафдан чиққан.

Шу боис бош мураббий Ханс-Дитер Флик «эл-класико»да ўнг қанот ҳимоячиси сифатида Хави Эспартга ишонч билдириши кутилмоқда.

Ёш футболчи «ПСЖ»га қарши учрашувда ёрқин ўйин намойиш этганди. Шу сабабли у «Реал»га қарши баҳсда ҳам асосий таркибдаги ўрнини сақлаб қолиши мумкин.