АҚШнинг “Интер Майами” клуби ҳужумчиси Лионель Месси 2022 йили Қатарда қўлга киритилган Жаҳон чемпионлиги унинг профессионал фаолиятидаги энг ёрқин нуқта эканини таъкидлади.
Аргентиналик футболчи нима учун айнан 2022 йили Қатарда қўлга киритилган Жаҳон чемпионлиги ўзи учун алоҳида аҳамиятга эга эканини шундай изоҳлади:
“Жаҳон чемпионатидаги ғалаба — фаолиятимнинг кулминацияси. Бу мен учун шунчаки орзудан ҳам каттароқ нарса эди. Турнир финалида Франция терма жамоаси дарвозасига киритган голларим, ўзининг моҳияти ва ўйиннинг қанчалик муҳимлиги сабабли бутун фаолиятимдаги энг қадрли голларга айланган”, дейди Месси.
Эслатиб ўтамиз, 2022 йили Қатарда бўлиб ўтган Жаҳон чемпионати финалида Аргентина терма жамоаси Францияни пеналтилар сериясида мағлуб этган эди. Ўша тарихий учрашувнинг асосий ва қўшимча бўлимлари 3:3 ҳисобидаги жанговар дуранг билан якунланган бўлса, пеналтилар сериясида Месси бошчилигидаги жамоанинг қўли баланд келган (4:2).
Шунингдек, ортда қолган ЖЧ-2026 турнирида ҳам аргентиналиклар финалгача етиб бориб, ҳал қилувчи баҳсда Испанияга имкониятни бой беришди. Айнан ушбу мусобақадан сўнг Лионель Месси миллий терма жамоадаги фаолиятига расман нуқта қўйганини эълон қилди.
