"Атлетико" бош мураббийи Диего Симеоне ҳужумчи Хулиан Альвареснинг мухлислардан узр сўраганини ижобий баҳолади.
Аргентиналик футболчи Ла Лиганинг "Депортиво"га қарши учрашувида (1:0) ғалаба голини урганидан сўнг мухлислардан кечирим сўраган эди.
"Узр сўрашдан қўрқмайдиган инсонларни жуда ҳурмат қиламан. Бу ҳеч қачон осон эмас. Хулиан учун хурсандман, энди у анча хотиржам бўлади. У бундай гапларни доим чин дилдан айтади.
Бизга Альварес керак. Мухлисларимиз орзу қилаётган юксак мақсадларга эришиш учун у ўзининг энг яхши савиясида бўлиши лозим", — деди Симеоне.
Эслатиб ўтамиз, Альварес ёзда "Атлетико"ни тарк этиш истагини билдириб, мухлисларнинг норозилигига сабаб бўлган эди. Ўша пайтда унинг "Барселона"га ўтиши ҳақида ҳам хабарлар тарқалган.
