"Наполи" бош мураббийи Массимилиано Аллегри "Рома"га қарши учрашув якунида юз берган воқеалар туфайли жазоланди ва жаримага тортилди.
Аллегри учрашувнинг 89-дақиқасида Рим жамоаси голининг ҳисобга олинганидан норози бўлди. Унинг фикрича, голдан олдин Леонардо Балерди Сама Бекемага нисбатан қоидабузарлик содир этган. Учрашув бош ҳаками Андреа Коломбо неаполликлар мураббийига қизил карточка кўрсатди. Шундан сўнг Аллегри захира ҳаками билан тортишиб қолди ва пиджагини ечиб, трибуналар остидаги хоналарга йўл олди.
Спорт судьясининг қарорига кўра, Аллегри Италия чемпионатининг кейинги икки турида иштирок этишдан четлатилди. Бундан ташқари, "Наполи" мураббийи 10 000 евро жарима тўлаши керак.
Расмий қарорда айтилишича, Аллегри "ҳакамлар бригадаси аъзоларига нисбатан ҳақоратомуз гапларни айтган; бундан ташқари, кийиниш хонасида ўша расмий шахсларга нисбатан ўта ҳурматсиз ибораларни ишлатган ва рақиб жамоа вакилига нисбатан тажовузкор хатти-ҳаракат содир этган".
Журналист Жанлука Ди Марционинг хабар беришича, "Наполи" ушбу қарор устидан апелляция бериш имкониятини кўриб чиқмоқда. Агар икки ўйинлик дисквалификация ўз кучида қолса, Аллегри "Монца" ва "Ювентус"га қарши учрашувларда мураббийлар ўриндиғида бўла олмайди.
