«Олтин тўп» учун овоз беришда 30 йилдан ортиқ вақтдан бери Россия номидан иштирок этиб келаётган журналист Константин Клешчев аргентиналик Лионель Месси ва португалиялик Криштиану Роналдуни таққослади. У бу ҳақда Sport24 нашрига берган эксклюзив интервьюсида гапирди.

— 2026 йил Месси ёки Роналду «Олтин тўп» учун овоз беришда кучли 30 таликдан жой оладиган сўнгги йил бўладими?

— Роналдунинг даври бир неча йил олдин тугади, Месси эса бироз узоқроқ ушланиб турди. Буни Криштианунинг ўйини кўп жиҳатдан жисмоний имкониятларга асослангани билан боғлайман.

Менинг фикримча, Роналду Мессидан мукаммалроқ футболчи. Унинг танасининг турли қисмлари билан гол ура олишини кўринг. Аргентиналик футболчининг майдондан 90 сантиметр баландликка сакраб, бош билан зарба беришини тасаввур қилиш қийин.

Мессининг чап оёғи унинг барча камчиликларини қоплаган. Майдонда вазиятни тўғри баҳолаш ва фикрлаш қобилияти эса унга Роналдуга қараганда узоқроқ вақт давомида энг юқори савияда қолиш имконини берди.

Бироқ келажакда Лионель ҳам, Криштиану ҳам «Олтин тўп» учун овоз беришда кучли 30 таликка киришига ҳеч қандай имконият қолмади. Эҳтимол, Кейн ҳам энди юқори ўринларни эгаллай олмайди.

Энди ёшлар даври келди: Мбаппе, Ямал, Холанд ва Хвича. Келаси йили асосий эътибор шу футболчиларда бўлади, — деди Клешчев.

Эслатиб ўтамиз, 2026 йилги «Олтин тўп» соврини «Бавария» ва Англия терма жамоаси ҳужумчиси Ҳарри Кейнга насиб этди. Месси 30 нафар номзод қаторида бўлиб, овоз бериш натижаларига кўра бешинчи ўринни эгаллади. Роналду эса бу йилги номзодлар рўйхатига киритилмади.