Франция 2038 йилги футбол бўйича жаҳон чемпионатига мезбонлик қилиш учун қўшма ариза топшириш имкониятини кўриб чиқмоқда.
Мамлакат футбол федерацияси президенти Филипп Диалло Ouest-France нашрига берган интервьюсида Германия билан ҳамкорлик қилиш эҳтимоли юқори эканини билдирди.
"Германия футбол федерацияси билан муносабатларимиз аъло даражада. Бундай ҳамкорлик нафақат миллий жамоалар футболи, балки бутун Европа учун янгиланиш рамзи бўлиши мумкин", — деди Диалло.
Маълумотларга кўра, 48 та жамоа иштирок этадиган мундиалга мезбонлик қилиш учун Франция ва Германияга учинчи Европа давлати ҳам қўшилиши мумкин.
"Бизда айрим ғоялар пайдо бўлмоқда. Бироқ бу жуда мураккаб лойиҳалар. Уларни амалга ошириш учун давлат органлари, хусусан, Франция ҳукуматининг қўллаб-қувватлаши зарур", — дея қўшимча қилди федерация раҳбари.
Диаллонинг таъкидлашича, ЖЧ-2038 учун расмий ариза топшириш масаласи Францияда 2027 йилги президентлик сайловларидан кейинги сиёсий вазиятга ҳам боғлиқ.
Эслатиб ўтамиз, Франция сўнгги марта 1998 йилда эркаклар ўртасидаги жаҳон чемпионатига мезбонлик қилган.
