Аргентина терма жамоасининг собиқ футболчиси Анхель Ди Мариянинг қизига таҳдид қилган эркак 7 йилу 6 ой муддатга озодликдан маҳрум этилди. Бу ҳақда The Touchline ижтимоий тармоқларда хабар берди.

45 ёшли Серхио Ди Ванни 2024 йилда Ди Мариянинг «Росарио Сентраль» клубига қайтиши ҳақидаги баёнотидан кейин футболчининг оиласига таҳдид қилган.

Футболчининг сўзларига кўра, жиноятчилар унинг синглисига тегишли кўчмас мулк агентлигига ҳужум қилиб, бино олдида пешонасига ўқ қадалган чўчқа бошини қолдиришган. Унга хат ҳам илова қилинган бўлиб, унда Ди Мария «Росарио Сентраль»га қайтса, кейинги жабрланувчи унинг Пия исмли қизи бўлиши айтилган.

Шунингдек, футболчига тегишли кўчмас мулк жойлашган турар жой мажмуаси яқинида ҳам ўқ овозлари эшитилган.

Ушбу таҳдидлар сабаб Ди Мария дастлаб клубга ўтишдан бош тортган. Бироқ 2025 йилда у барибир «Росарио Сентраль»га қўшилди ва жамоага Аргентина чемпионатида ғолиб чиқишга ёрдам берди.

Ди Мария профессионал фаолияти давомида «Реал» (Мадрид), «Манчестер Юнайтед», «ПСЖ», «Ювентус» ва «Бенфика» клубларида тўп сурган.