Бугун, 30 октябрь куни футбол бўйича Ўзбекистон Суперлигасининг 26-тур учрашувларига старт берилади. Турнинг дастлабки ўйин кунида учта баҳс ўтказилиши режалаштирилган.
Куннинг эътиборли учрашувларидан бири Урганчда бўлиб ўтади. Унда маҳаллий «Хоразм» жамоаси чемпионлик учун курашаётган Тошкентнинг «Пахтакор» клубини қабул қилади.
25-турда «Нефтчи»га 1:3 ҳисобида мағлуб бўлган «Пахтакор» учун ушбу баҳс муҳим аҳамиятга эга. Тошкентликлар чемпионлик пойгасидаги имкониятларини сақлаб қолиш учун сафарда ғалаба қозонишга интилади.
Куннинг яна бир учрашуви Қўқонда ташкил этилади. Маҳаллий «Қўқон-1912» ўз майдонида Навоийнинг «Қизилқум» клуби билан куч синашади. Мазкур баҳсни бош ҳакам Абдурашид Худойберганов бошқариб боради.
Шунингдек, Жиззахнинг «Сўғдиёна» жамоаси Зоминда «Бухоро»ни қабул қилади. Ушбу учрашувда бош ҳакам вазифасини Акобирхўжа Шукуруллаев бажаради.
Эътиборлиси, бугунги барча баҳслар бир вақтда — соат 18:30 да бошланади.
Суперлига. 26-тур
30 октябрь, жума
18:30. «Қўқон-1912» – «Қизилқум»
Бош ҳакам: Абдурашид Худойберганов.
18:30. «Сўғдиёна» – «Бухоро»
Бош ҳакам: Акобирхўжа Шукуруллаев.
18:30. «Хоразм» – «Пахтакор»
Бош ҳакам: Рустам Чориев.
Барча вақтлар Тошкент вақти билан кўрсатилган.
26-турнинг навбатдаги учта учрашуви 31 октябрь куни ўтказилади. Унда «Сурхон» – «Насаф», «Машъал» – «Динамо» ва «Навбаҳор» – «Андижон» жамоалари ўзаро тўқнаш келади.
1 ноябрь куни эса «Локомотив» ОКМКни қабул қилади. «Нефтчи» ва «Бунёдкор» ўртасидаги учрашув 14 ноябрга белгиланган.
