“Интер Майами” ҳужумчиси Лионель Месси яқин келажакда Аргентина чемпионатига ўтишни режалаштирмаяпти. Бу ҳақда инсайдер Фабрицио Романо ўзининг ижтимоий тармоқлардаги саҳифасида маълум қилди.

Аввалроқ Аргентина ОАВларида 2022 йилги Жаҳон чемпиони фаолиятини ватанида якунлашни истаётгани ва 2027 йилда “Ньюэллс Олд Бойз” сафига қўшилиши мумкинлиги ҳақида хабарлар тарқалганди.

Бироқ Романо маълумотига кўра, на футболчининг ўзи, на унинг оиласи яқин келажакда Аргентинага қайтиш вариантини кўриб чиқаётгани йўқ. Месси “Интер Майами”да амалдаги шартномаси якунига қадар қолишни режалаштирмоқда. Келишув 2028 йил 31 декабргача амал қилади. Шунингдек, аргентиналик футболчи АҚШ клуби билан шартномасини узайтириши ҳам мумкин.

Маълумот учун, “Ньюэллс Олд Бойз” Месси туғилиб ўсган Росарио шаҳрининг жамоаси ҳисобланади. У 1994–2000 йилларда клубнинг болалар жамоаларида тўп сурган. 13 ёшида эса отасининг ташаббуси билан “Барселона” академиясига йўл олган.