Бельгия терма жамоаси, «Интер» ва «Рома»нинг собиқ ярим ҳимоячиси Ража Наингголан икки йилга озодликдан маҳрум этилиши мумкин.
La Gazzetta dello Sport маълумотига кўра, Брюссель прокуратураси футболчига нисбатан шундай жазо тайинлашни сўрамоқда.
Тергов 105,5 минг евролик молиявий ўтказмалар билан боғлиқ. Айблов томонига кўра, ушбу маблағлар Жанубий Америкадан Европага кокаин етказиб беришда гумонланаётган жиноий гуруҳга алоқадор.
Наингголанга гиёҳванд моддалар савдоси эмас, фақат пул ювиш айблови қўйилган. Прокуратура унга 105 минг евро жарима солишни ҳам талаб қилмоқда.
Футболчи эса молиявий операциялар ўтказган шахсининг жиноий фаолиятидан бехабар бўлганини таъкидламоқда. 13 ноябрь куни унинг адвокатлари судда ўз далилларини тақдим этади.
