Бундан бироз вақт олдин Косонсойда ёшлар биринчилининг 22-туридан ўрин олган “Навбаҳор” – “Қизилқум” жамоалари ўртасидаги учрашув якунланди. Зарафшонликларга қарши ўйин тақдирини иккинчи бўлимда Билол Шарофиддинов томонидан киритилган ягона гол ҳал қилди.

Учрашувда “Навбаҳор” ёшлари таркиби қуйидагича кўриниш олди: Ислом Жўраев, Мирзоҳид Собиров, Санжар Тошпўлатов, Рустам Аъзамов, Муҳаммад Нуриддинов, Мурод Раҳманов, Азим Аҳмедов, Собит Воҳидов, Акбаршо Рашидханов, Александр Лупашко, Абдулазиз Султонов. Захирадан майдонга тушганлар: Билол Шарофиддинов, Сардор Теляков, Жавлон Холмирзаев, Азизбек Турғунбоев, Мухсин Манавиханов, Жамол Абдужабборов, Азиз Умаров.

Ўйин хусусида қисқача тўхталадиган бўлсак, устунлик асосан наманганликлар томонида бўлди. Бунинг натижасида рақиб дарвозаси олдида қатор хавфли вазиятлар юзага келтирилди. Лекин, вазиятлардан фойдалана олмаслик ҳисобнинг кичик кўриниш олишига сабаб бўлди. Абдулазиз Султонов, Собит Воҳидов ва Акбаршо Рашидхоновлар ўзлари учун яратилган имкониятлардан самарали фойдалана олишганида, ҳисоб йирик кўриниш оларди. Биринчи бўлим ўрталарида Азим Аҳмедов ўрнига майдонга туширилган Билол Шарофиддиновнинг голи эса ҳар қандай учрашувни безагига айланиши мумкин. Шарофиддиновнинг чамаси 30 метрлардан тепган тўпи “Қизилқум” жамоаси дарвозаси тўридан ўрин олди.

Ушбу ғалабадан кейин “Навбаҳор” ёшлари ўз ҳисобларидаги очколар сонини 32 тага етказиб олишди. Бу эса уларга мусобақа жадвалининг 7-поғонасидан мустаҳкам жойлашиб олиш имкониятини бермоқда.