БААда бўлиб ўтаётган ўсмирлар ўртасидаги жаҳон чемпионатида иштирок этаётган Ўзбекистон ўсмирлар термаси кеча ўзининг биринчи учрашувини ўтказди. Гуруҳдаги дастлабки беллашувда Панамага қарши баҳс олиб борган Дилшод Нуралиев шогирдлари 2:0 ҳисобида зафар қучишди.

Ўйиндаги дастлабки голни иккинчи бўлимда захирадан майдонга тушган Шоҳжаҳон Аббосов киритди. “Машъал” футбол мактаби тарбияланувчиси 63-дақиқада Акобир Тўраевнинг ўрнига тушиб, 68-дақиқада ҳисобни очди. У жарима зарбасидан етказиб берилган тўпни ажойиб тарзда дарвоза тўрига жойлаб қўйди.

Мазкур баҳсда “машъалчилар”дан яна бир футболчи Отабек Шукуров ҳам ҳаракат қилди. У жамоа сардори сифатида 90 дақиқани майдонда ўтказди. Ўсмирларимиз навбатдаги баҳсни 21 октябрь куни Марокаш термасига қарши ўтказишади.