Кеча Фужайрадаги стадионнинг матбуот марказида Марокаш ва Ўзбекистон терма жамоалари бош мураббийлари иштирокида матбуот анжумани ўтказилди. Унда Дилшод Нуралиев ва Абдуллоҳ ал-Идрисий иштирок этишди.

— Биринчи ўйинда ғалаба қўлга киритилди. Иккинчи ўйинда бу ғалабанинг салбий таъсири бўлмаслиги учун нима қилиш керак?
Дилшод Нуралиев: — ЖЧда биринчи ўйинлар доимо қийин бўлади. Бу қийинчиликдан яхши ўтиб олдик. Марокаш — Африканинг энг кучли жамоаларидан бири. Шуларни инобатга олган ҳолда 2-тур ўйинига тайёрланяпмиз. Эртага бизни қизиқарли ўйин кутиб турибди.    

Абдуллоҳ ал-Идрисий: — Иккинчи ўйин турнирдаги қийин ўйинлардан бири бўлади деб ўйлайман. Ўзбекистон — кучли жамоа. Осиё чемпионларига қарши ўйиннинг муҳимлигини ҳис қилган ҳолда майдонга тушамиз. Учрашув оғир бўлади.

— Фужайра шаҳри ва унинг меҳмондўстлиги ёқдими? (БААлик журналист саволи)
Абдуллоҳ ал-Идрисий: — Арабларга араб мамлакатида юриш қанчалик ёқимли эканлигини айтиш шарт бўлмаса керак!
Дилшод Нуралиев: — Шаҳарга экскурсияга чиқдик. Миллий таомлардан татиб кўрдик. Бу ернинг тамолари бизнинг таомларга ўхшаб кетаркан. Умуман олганда, шаҳар бизга ёқди.

— Захира ўриндиғининг бойлиги ва узунлиги ўйин натижасига қанчалик таъсир қилади? Марокашда бу борада танлов катта, Ўзбекистонда-чи?
Дилшод Нуралиев: — Марокаш терма жамоаси таркибида индивидуал жиҳатдан яши маҳоратга эга, Европа клубларида ўйнайдиган футболчилар бор. Ўзбекистоннинг захира ўриндиғи балки Марокашникига каби маҳоратли эмасдир, лекин уларнинг ҳужумларини тўхтата оладиган футболчилар таркибимизда бор.
Абдуллоҳ ал-Идрисий: — Ўйинда 11 футболчи майдонга тушади. Ўйин арафасида қайси футболси ўйинга тайёр бўлса, ўша майдонга тушади.

—Марокаш биринчи ўйинда ишқибозларнинг қўллаб-қувватлаши натижасида катта кучга эга бўлди. Эртага ҳам шундай бўлиши кутилмоқда. Ўзбекистон бунга тайёрми?
Дилшод Нуралиев: — Биз бунга тайёрмиз. Шунингдек, биз эртага 200дан ортиқ ўзбекистонлик ва бизга мухлислик қиладиган томошабинларни кутаяпмиз. Уларнинг қўллаб-қувватлаши ҳам бизга куч беради.

— 200дан ортиқ? Кеча "Аш-Шабоб"даги ўзбекистонлик Ҳайдаровни қўллаб турганлар ҳам шуларнинг ичига кирадими ё яна борми?
Дилшод Нуралиев: — Улар ҳам Фужайрага келишса керак. Бу ердаги барча ўзбек ва ўзбекистонликларни, бизга мухлислик қиладиганларни стадионда кутамиз.

Абдуллоҳ ал-Идрисий: — Ростдан ҳам биринчи ўйинда стадион бизга ишқибозлик қилди. Лекин биз бунга кўп ҳам учмаймиз.

Футболчиларга савол: — Иккинчи ўйин арафасида босим каттами?
Набил Жаъдий: — Биринчи ўйин бизга фақат 3 очко берди. Бўлди. Эртага эса навбатдаги ўйинни ютиш керак.
Отабек Шукуров: — Биринчи ўйиндаги ғалаба тарихда қолди. Олдинга интилиш керак. Яна ютиб, ишқибозларга байрам улашмоқчимиз.