Ўзбекистон ва Марокаш ўртасидаги ўйиндан сўнг "Фужайра" стадионида матбуот анжумани ўтказилди. Матбуот анжуманида ҳар иккала жамоа бош мураббийлари Дилшод Нуралиев ва Абдуллоҳ ал-Идрисий бир вақтнинг ўзида иштирок этишди.

— Ўйин ҳақидаги умумий таассуротлар ва фикрларингиз.
Абдуллоҳ ал Идрисий: — Ўйин қийин ўтишини билардик. Бугунги рақибимиз кучли ва ўйин ҳам шунга яраша кучли бўлди. Қийин ўйин бўлди. Натижани эса адолатли деб айта оламан.
Дилшод Нуралиев: — Марокаш кучли жамоа эканлигини қуръа маросимидаёқ билардик. Бу жамоага қарши ўйинга тайёргарлик кўриш учун мусобақагача Африканинг Тунис ва Кот-д'Ивуар терма жамоалари билан ўртоқлик ўйини ўтказгандик. Африка жамоалари бу ёшдаги чемпионатларда жуда кучли бўлишади. Марокаш бош мураббийини табриклайман, уларда зўр жамоа бор.

— Марокаш ўйин давомида устунроқ ва кучлироқ кўринди, аммо натижа дуранг бўлди. Натижадан қониқиш ҳосил қилдингизми?
Абдуллоҳ ал-Идрисий: — Бундан ҳам бадтарроқ бўлиши мумкин эдию?! Ютқазиб қўйганимизда нима бўларди? Яхши ўйнаб ютқазганлар ҳам бор-ку!

— Кейинги ўйинда Панама ҳам, Хорватия ҳам ютиш мажбурияти остида қолган. Бу омил сизларга 3-турда муаммо туғдириши мумкинми?
Абдуллоҳ ал-Идрисий: — Бунинг аҳамияти йўқ. Биз ўйинга одатдагидек тайёргарлик кўрамиз. Рақибга муносабатимиз ҳам жиддий. Фақат ғалаба учун ўйнаймиз.
Дилшод Нуралиев: — ЖЧда ҳамма ўйин муҳим. Хорватияга қарши ўйин биз учун худди Панама ва Марокаш билан ўйинлардек муҳим аҳамиятга эга бўлади.