Кеча бўлиб ўтган гуруҳнинг иккинчи баҳсидан кейин Дилшод Нуралиев микс-зонада ФИФА расмий сайти учун интервью берди.
— Ўйин давомида сизни кузатиб бордик. Жуда катта ҳаяжонга, эҳтиросга берилдингиз. Бу ҳолат соғлик учун зарар эмасми? Ўзингизни бироз эркин тутсангиз бўлмайдими?
— Эҳтиросга берилиб кетиш — менинг энг катта камчилигим. Агар захира ўриндиғида ўтирсам, қаттиқ ҳаяжонга берилганимдан мазам қочиб қолиши мумкин. Шу боис, мана шундай эҳтирослар орқали ҳаяжонни чиқариб юборишга ҳаракат қиламан. Бу, биринчидан. Иккинчидан, бу йигитлар менинг бундай муносабатимга ўрганиб қолишган. Агар жойимда индамай ўтирсам, улар ўйнамай қўйишади.
— Ўзбекистон терма жамоасининг кейинги босқичга чиқиш имкониятларини қандай баҳолайсиз?
— Хорватия терма жамоасига қарши ўйин олдидан ҳеч нарса деб бўлмайди. Олдимизда яна бир муҳим ўйин кутиб турибди. Бу ўйинга тайёргарлик кўрамиз. Ҳали камчиликларимиз бор, уларни бартараф этишга ҳаракат қиламиз. Бугун Африка жамоаси билан ўйнаганимизни унутмаслик керак. Африка жамоалари бу ёшда ҳар доим фаворит бўлиб келишган. Хорватияга билан ўйинда ҳам чиройли ўйин кўрсатиб, ишқибозларни хурсанд қилишга ҳаракат қиламиз.
— Ўзбекистон ушбу мусобақага 2011 йилги натижани такрорлаш учун келганми ёки жамоангизнинг чемпионлик учун ҳам имконият бор, деб ўйлайсизми?
— Ушбу ёш тоифасида фаворит сифатида Ўзбекистон, Бразилия ёки Марокашни тилга олиб бўлмайди. Бу ёшда ўйинчиларнинг психологияси ўзгарувчан бўлади. Ҳар бир ўйинга тўғри тайёргарлик кўрса, бу мақсадни ҳам амалга оширса бўлади.
— Ўйиндан кейин доира ҳосил қилиб, футболчилар билан суҳбат қурдингиз. Сир бўлмаса, ўша пайтда уларга нималар дедингиз?
— Мен уларни ажойиб ва матонатли ўйин билан табриклаб, уларга раҳмат айтдим. Чунки ўйин қийин бўлди. Ўз характерларини кўрсата олишгани учун уларга миннатдорчилик билдирдим.
Ушбу интервьюни қуйидаги берилаётган видео орқали ҳам тинглашингиз ва терма жамоанинг машғулотларидан лавҳаларни томоша қилишингиз мумкин.
