Бу икки жамоа бунгача атиги бир маротаба расмий мусобақаларда рўбарў келишган.

Жорий мавсумнинг биринчи давраси 4-тури доирасида ўтган Тошкентдаги баҳсда Камолиддин Мурзоев томонидан киритилган гол “қалдирғочлар”га уч очкони тақдим қилган эди. Ўша ўйинда Бахтиёр Ашурматов бошқарувидаги гулистонликлар чемпионат пешқадамига муносиб қаршилик кўрсатишганини таъкидлаб ўтиш жоиз.

“Гулистон” – “Бунёдкор” учрашувини тошкентлик Владислав Цейтлин бошчилигидаги ҳакамлар гуруҳи бошқариб боради. Таъкидлаш жоизки, Цейтлин ҳакамликдаги фаолияти мобайнида бунгача 14 маротаба “Бунёдкор” иштирокидаги учрашувларда хизмат қилган.

“Бунёдкор” ярим ҳимоячиси Жавлон Иброхимов Гулистондаги баҳсда майдонга тушадиган бўлса, у ҳолда унинг “қалдирғочлар” сафидаги ўйинлари сони роппа-роса 100тага тенг бўлади. У юбилей учрашув остонасида турибди.

Яна бир қизиқ жиҳатлардан бири шуки, “Бунёдкор” ҳужумчиси Олександр Пишур 23-тур баҳсида майдонга тушса ва ўз ҳисобига гол ёзиб қўйгудек бўлса, унда украиналик ҳужумчи тўпурарлар баҳсида якка пешқадам бўлиб олади. Айни пайтда, Олександр Пишур ва Фарҳод Тожиев 17тадан голга муаллифлик қилишиб, қўшпешқадамлик қилишмоқда.

23-тур доирасидаги “Гулистон” – “Бунёдкор” учрашуви 23 октябрь куни соат 15:00да бошланади.