БАА яшил майдонларида бўлиб ўтаётган ўсмирлар ўртасидаги жаҳон чемпионати жуда қизғин давом этяпти.

Ушбу мусобақада “Машъал”нинг уч нафар футболчиси иштирок этаётгани хусусида олдин хабар бериб ўтгандик. Кеча терма жамоамиз сардори Отабек Шукуров билан учрашиб, жаҳон чемпионатидан олаётган таассуротлари борасида сўрадик.

“Жаҳон чемпионати ҳаммамизга жуда ёқпяти, - дейди Шукуров. – Ҳар бир ўйиннинг савияси юқори. Ҳар бир учрашувда Ўзбекистондан келган мухлислар бизни қўллаб туришибди ва бу бизга катта далда бўлмоқда. Умуман олганда, бу ерда ўзимизни бегонадек ҳис қилаётганимиз йўқ”.

“Менга ҳар иккала учрашув ҳам ёқди. Айниқса, Марокаш билан кечган баҳс жуда қизиқарли бўлди. Лекин биринчи ўйинда кўпроқ қийналдик, деб ўйлайман. Чунки маҳаллий шароитга мослашиш сал қийинроқ кечди. Ҳозир эса ҳаммасига кўникиб бўлганмиз”.

“Жаҳон чемпионатида ҳар бир футболчи ўзини кўрсатишни истайди. Мен ҳам бундан мустасно эмасман. Турнирдаги асосий мақсадимиз имкон қадар узоққа бориш. Насиб қилса, Ватанимизга юқори ўринларни эгаллаган ҳолда қайтамиз”.