Осиёнинг энг кучли футзал клубларидан бири ҳисобланган «Санойи Гити Пасанд» жамоаси 25 октябрдан пойтахтимизда йиғин ўтказмоқда. Эронлик футзалчилар дастлабки ўртоқлик учрашувини Тошкентнинг «Бунёдкор» клубига қарши ўтказди.

“Ўзбекистон” спорт мажмуасида ташкил этилган ўртоқлик учрашувида меҳмонлар 11:1 ҳисобида зафар қучди.

Энди 28-29 октябрь кунлари «Санойи Гити Пасанд» футзал бўйича Ўзбекистон миллий терма жамоаси билан куч синашади.

Эроннинг Исфаҳон шаҳри шарафини ҳимоя қилувчи «Санойи Гити Пасанд» футзал клуби 2010 йилда ташкил этилганига қарамай, қисқа фурсат ичида нафақат Эрон, балки Осиёнинг энг кучли жамоаларига қаторига қўшилди. Жамоа 2012/2013 йилги мавсумда Эрон чемпионлигини қўлга киритган бўлса, клублар ўртасидаги 2012 йилги Осиё чемпионати финалида Тошкентнинг «Ардус» жамоасини мағлуб этиб, қитъада тенгсиз бўлганди. Исфаҳонликлар 2013 йилги Осиё чемпионатида ҳам финалга қадар етиб боришди, бироқ ҳал қилувчи ўйинда Таиланднинг «Чонбури» жамоасига пенальтилар сериясида имкониятни бой берди.

Эътиборли томони, «Санойи Гити Пасанд» таркибидаги аксарият ўйинчилар Эрон футзал терма жамоаси аъзолари ҳисобланишади. 2012 йили Таиландда бўлиб ўтган жаҳон чемпионатида Муҳаммад Кашоварз терма жамоа сардори сифатида майдонга чиққан, шунингдек, «Санойи»дан Афшин Козимий, Ҳусайн Тойибий, Аҳмад Исмоилпур, Сепаҳр Муҳаммадий каби ўйинчилар чақирилган эди.