"Олмалиқ" - "Насаф" учрашуви якунлангач ҳар иккала жамоа мураббийлари ўйин ҳақидаги ва мавсум борасидаги фикрлари билан ўртоқлашишди.

Игорь Шквирин: - “Насаф” олий лигадаги шаклланган жамоалардан бири. Жамоа бежизга учинчи поғонада бормаётганлигини исботлашга уринди. Аммо бизнинг футболчилар бугун негадир ҳимояда ўта бўш ҳаракат қилишди. Эҳтимол бу мавсумнинг сўнгги ўйини бўлганлиги учундир. Лекин нима бўлган тақдирда ҳам йигитлар бу қадар пала-партиш ҳаракат қилишмаган эди мавсум давомида. Ҳисоб ўйинга мос бўлди. Футболчилар рақибга муносиб қаршилик кўрсатиб, улардан ҳеч бир жабҳада қолишмасликларини исботлашди. Ўтган йилги билан таққослаганда, биз 8-ўриндан 5-ўринга кўтарилдик. Кучли тўртталикдаги ҳеч бир жамоага икки марта ютқазмадик. Ҳаттоки “Пахтакор”ни ҳар иккала даврада мағлуб этишни уддасидан чиқдик. Бу ҳам жамоамиз юксалаётганидан дарак беради.

Рўзиқул Бердиев: - Бугун икки таймда икки хил футбол гувоҳи бўлдик. Биринчи бўлимда “Олмалиқ” бизга қарши яхши ўйин намойиш этди. Бир тур илгари мамлакат чемпионига қарши жиддий баҳсни ўтказгандик. Шу боис бироз чарчоқ аломатлари юзага чиққандек бўлди. Бу майдонда сезилиб турди. Бугунги натижа ўйинга яраша бўлди, деб ўйлайман. Ўйлашимча мавсумни ёмон ўтказмадик ва ўзимиз учун ижобий якунладик. Ўзбекистон кубогида ҳам финалга қадар етиб бордик. Албатта, Ўзбекистон кубоги Финалида ғалаба қозонишмиз мумкин эди. Аммо энг керакли паллада бир қатор етакчи ўйинчилар Шоҳруҳ Гадоев, Шуҳрат Муҳаммадиев, Кенжа Тўраев жароҳат олиб сафдан чиқишди. Лекин бу ҳам футболни бир қисми. Шунга қарамай қийин мавсумни медаллар билан якунлашга эришдик.