Бугун ФИФАнинг терма жамоалар учун ажратган расмий куни. Шу муносабат билан сайёрамизнинг турли минтақаларида расмий ва ўртоқлик мақомидаги учрашувлар ташкил этилмоқда. Ўзбекистон миллий терпма жамоаси ҳам бугун Осиё кубогининг саралаш учрашуви доирасидаги навбатдаги учрашувни ўтказади. Ханой шаҳридаги “Май Дин” стадионида Вьетнам терма жамоасига қарши ўтказиладиган ўйиндаги ижобий натижа Ўзбекистон миллий терма жамоани Австралия-2015га йўлланма билан тақдирлаши мумкин. Кеча ўйинолди матбуот анжуманида миллий терма жамоамиз бош мураббийи Миржалол Қосимов бугунги учрашувда фақат ғалаба учун майдонга тушилажагини айтиб ўтди.

Вьетнамликлар ҳам бугун Ўзбекистонга қарши катта куч ташлашаши аниқ. Ушбу давлат футболчилари Тошкентдаги биринчи ўйиндаги мағлубият аламини олиш учун ҳаракат қилишади.

Бугунги ўйинни Жанубий кореялик Ким Жон Хьюк бошчилигидаги ҳакамлар гуруҳи бошқаришади. Ўйин Тошкент вақти билан соат 17.00да старт олиши кутилмоқда.

Шунингдек, бизникилар билан бир гуруҳдан жой олган БАА - Гонконг учрашуви 20:30 да бошланади. Ҳозирда Е гуруҳида БАА-9, Ўзбекистон ва Гонконг 4 тадан очкога эга. Вьетнам термаси барча ўйинларни бой берган.

Бугун шунингдек, А гуруҳида Сурия - Сингапур, B гуруҳида Тайланд - Эрон ва Кувайт - Ливан, C гуруҳида Хитой - Индонезия ҳамда Саудия Арабистони - Ироқ, D тўртлигида Яман  - Қатар, Малайзия - Баҳрайн учрашувлари бўлиб ўтади.

A гуруҳидаги Уммон ва Иордания термалари баҳси иккинчисининг жаҳон чемпионати қитъалараро плей-оффидаги иштироки боис 31 январь кунига қолдирилди.