“Машъал” раҳбарияти 2012 йил жамоа олий лигадан тушиб кетгач, Муҳаммадиевни “Насаф”га ижарага берганди. Натижада тезкор футболчининг ижара муддати якунига етиб, яна муборакликлар сафига қайтди.

Бу ҳақда “Машъал” бош директори Илҳом Қурбонов шундай деди: “Клубимиз тарбияланувчиси Шуҳрат Муҳаммадиев яна сафимизга қайтди. Унинг амалдаги шартномаси шу йилнинг 1 декабрида тугайди, лекин футболчи билан яна икки йилга мўлжалланган шартнома туздик. Шуҳратнинг ўзи билан гаплашганимизда фаолиятини “Насаф”да давом эттириш нияти борлигини маълум қилди, аммо у ўзимизга ҳам керак. Чунки келаси йил олий лигада бизга ҳам яхши ўйинчилар зарур бўлади”.

Шуни айтиб ўтиш лозим, “Насаф” Шуҳрат Муҳаммадиевни тўлиқ қўлга киритишни хоҳламоқда ва бу борада музокара олиб боришга тайёр. Қолаверса, футболчининг ўзи ҳам Қаршида тўп сурмоқчи. Балки, кейинчалик томонлар трансфер борасида ўзаро келишиб олишлари мумкин. Эслатиб ўтамиз, бу мавсум Муҳаммадиев олий лигада 16та ўйинда майдонга тушиб, 2та гол урди.