Хабар бериб ўтганимиздек, Бухоро шаҳрида 2001 йил туғилган футболчилар ўртасида Республика биринчилиги ўтказилди.

Мазкур мусобақада Қашқадарё вилояти шарафини ҳимоя қилган “Машъал” футбол мактабининг 2001 йилда туғилган тарбияланувчилари фахрли учинчи ўринни қўлга киритишди. Турнирда биринчи бўлиш мезбонлар – Бухоро жамоасига насиб этди.

Бухорода ўтказилган Республика биринчилигида “Машъал” футбол мактаби бунгача бир марта совриндор бўлганди. Яъни, 1996 йилда туғилган футболчиларимиз мазкур мусобақада биринчи ўринни қўлга киритишганди. Ўшанда жамоага Жамшид Ботиров билан Насим Шоимов мураббийлик қилганди. Мана энди орадан вақт ўтиб, 2001 йилги тарбияланувчиларимиз ҳам совриндорлар қаторидан жой олишди. Бунинг учун гуруҳ мураббийлари – Икрем Репатов билан Жонибек Эгамбердиевга алоҳида миннатдорчилик билдирсак арзийди. Ўйлаймизки, Икрем Репатов шуғуллантираётган гуруҳдан келажакда ажойиб футболчилар етишиб чиқади.