ОФК ҳамда Океания футбол федерациялари жаҳон чемпионати учун бериладиган яримта квоталарини бирлаштиришмоқчи. Бу ҳақда Осиё футбол иттифоқи президенти Салмон Иброҳим кеча бўлиб ўтган йилнинг энг яхшиларини тақдирлаш марисимида маълум қилди.

Ҳар икки федерациянинг вакиллари жаҳон чемпионати саралашининг ўтиш ўйинларида мағлубиятга учраганидан кейин гапни бир жойга қўйиб гаплашиб олишмоқчи. Хабарингиз бор, Иордания ўтиш ўйинларида Уругвай тўсиғидан ўтолмаган бўлса, Янги Зелландия Мексикага имкониятни бой берган эди. Қизиғи, ҳар икки жамоа биринчи ўйинда Америка қитъаси вакилларидан бешта гол ўтказиб юборишганди.

«Бизда Австралия ҳам ўйнашини унутмаган ҳолда қандай қилиб яримта квоталаримизни бирлаштириш ҳақида ўйлашимиз керак. Бу масалада Океания расмийлари билан маслаҳатлашяпмиз. Географик жиҳатдан ҳам унча узоқ эмасмиз. Ўйлаб кўриш учун вақт бор. Охирги қарорни ФИФА қабул қилади»,- дейди президент.

Хабарингиз бор, Осиё футбол иттифоқи дунёдаги энг каттаси ҳисобланади. Унда 46та федерация аъзо. Сариқ қитъа учун жаҳон чемпионатида 4,5та ўрин ажратилади. 11та федерациядан ташкил топган Океания вакилларига эса яримта ўрин ажратилади. Охириги марта бу федерациядан Янги Зелландия жаҳон чемпионатига чиқган ва ЖАРдаги мундилада мағлубиятга учрамаган ягона жамоа бўлган эди.