30 ноябрь куни муҳташам "Бунёдкор" стадиони маросимлар залида 2013 йилги Ўзбекистон чемпиони ва кубок соҳиби “Бунёдкор” жамоаси аъзоларининг йил якунларига бағишланган байрам оқшоми бўлиб ўтди. Унда клубнинг барча ёш тоифаларидаги жамоалари, мураббийлар ва маъмурият, футбол жамоатчилиги вакиллари иштирок этишди. Таъкидлаш лозимки, бу йилги мавсумда “қалдирғочлар” мамлакат чемпионати ва кубок баҳсларидан ташқари Ёшлар лигасида ҳам биринчи ўринни эгаллаб “Олтин хет-трик” қайд этишди.
Дастлаб Ёшлар ўртасида Ўзбекистон чемпиони бўлган клуб ёшлар жамоасига кичик олтин медалларни Ўзбекистон Футбол федерацияси бош котиби Сардор Раҳматуллаев топширди. Федерация президенти, Ўзбекистон миллий олимпиа қўмитаси раиси, сенатор Мираброр Усмонов жамоанинг асосий таркиб аъзоларига олтин медалларни тақар экан, уларни улкан муваффақиятлари билан қутлаб келгусида Осиё майдонларида ҳам етакчи бўлиш вазифасини юклади. Клуб ҳомийси ҳисобланган “Ўзбекнефтгаз” миллий холдинг компанияси раисининг биринчи ўринбосари Алишер Султонов ҳам жамоани муваффақиятлари билан самимий табриклади.
Бутун мавсум давомида майдонда ўйнаган футболчилар ва уларнинг яқинлари бу оқшомда мамлакатимизнинг етакчи санъаткорлари томонидан ижро этилган қўшиқлар оҳангида ўйинга тушишди.
