“Титаник”ни кўргансиз. Фильмнинг клуминацияси деб Жекнинг чўкаётиб Роузга айтган гапларини келтириш мумкин: “Нима бўлса ҳам тирик қолишга сўз бер…”. Ўша онда йигит ўлишини сезган эди. Қиз унга вада берди: “Мен ўлмайман…”. Таниқли хонанда Селен Дион қизнинг вадасини қўшиқ қилиб айтди: “My heart will go on” (Менинг юраги уришда давом этади). Ҳа, ўлим билан юзлашган инсонни енгиш жуда қийин!

Эрик Абидал. “Барселона” таркибида жуда ажойиб ўйинлари билан бутун дунёга танилган ҳимоячи. Сўнги йиллар франциялик футболчи учун осон кечмади. У саратонга чалингани учун бир қатор мураккаб операцияларни бошдан кечирди. Ўзининг айтишича, ҳаттоки оғриқ зўрлик қилганда ўз жонига қасд қилмоқчи бўлган. Лекин Эрик енгилмади. 16 кг озиб кетди, лекин у тирик қолиш учун курашди. Ҳаммаси ортда қолиб “Барселона”га қайтди. Мухлислар уни жуда қаттиқ ҳурмат қилишарди. Эсингиздами Пуйолнинг 2011 йилги чемпионлар лигаси финалидаги иши? Ўшанда Пуйол чемпионлар лигаси кубоги топширилаётганда сардорлик боғичини айнан Абидалга берган ва кубокни у қабул қилиб олганди. “Барселона” футболчиларнинг кўпчилиги кўз ёшини тийиб туролмади. Жамоанинг уй учрашувида эса мухлислар 22-дақиқада уни олқишлашди. Биласиз, Эрик 22-рақамда ҳаракат қилади. Бир сўз билан айтганда ҳеч ким уни ёлғизлатиб қўймади. Лекин! “Барселона”… футболчининг айтиши, бўйича касалхонада ётган вақтида “Барселона” унга маош тўламаган. Бунинг устига жамоа у билан шартномани узайтиришни хоҳламади – буюй хатога йўл ўйди. Йўқ, йўқ Абидалсиз жамоа ҳимояси кучсизлашиб қолмади. Лекин “Барселона” одамийлик чегарасидан чиқиб кетди. Абидалга “қарилик” ташхизини қўйишди. Аслида эса Россел жаноблари фойдасиз футболчини нима қиламиз қабилида иш тутди. Йўқ, у таслим бўлмади. Ҳозир “Монако”да ҳимоя қўрғонини ушлаб турибди. Франция терма жамоасига айнан князлик жамоасидаги ажойиб ўйинлари учун мунтазам чақирилмоқда, “Барселона”да ўйнаганининг ҳурмати учун эмас. Ҳимоячи Дани Алвес Абидал билан жуда яқин эди. У кетгача Алвес ҳам “Барселона” билан янги шартнома имзолашни хоҳламади. Жамоанинг бу ишидан қаттиқ ранжиганини таъкидлади. Ҳаттоки, ўзининг рақамини 22-га ўзгартирди. Алвес Эрикга донорлик қилмоқчи бўлгани ҳам рост. Алвес бу ҳақда шундай дейди: “Мен унга жигаримнинг бир қисмини беришга тайёр эдим. Тўғри, бундан кейин мен футбол ўйнай олмасдим, лекин инсон ҳаёти ҳар нарсадан устун, футболдан ҳам. Мен Эрик ва унинг оиласини қаттиқ ҳурмат қиламан. “Барселона”нинг бу ишидан қаттиқ ғазабдаман”. Ўзи Сандро Россел келганидан кейин жамода қандайдир меҳр-оқибат йўқолгандай бўлиб қолганди. Охирги йилларда “Барселона” шу даражада ўйин кўрсатдики, уни “Dream team” деб атай бошлашди. Спорт тарихидаги энг зўр жамоа “Барселона” деганлар ҳам топилди. Бир сўз билан айтганда “Барселона” ўз номини тарих зарварақларига зарҳал ҳарфлар билан битиб қўйди. Буюк жамоа эканини исботлади, лекин айнан шу иши учун кўпчиликнинг, ҳаттоки Каталониялик мухлисларнинг кўнглини қолдирди. Нима ҳам дердик, ғарбда инсонийлик, меҳр-оқибат каби биз учун ўлмас туйғулар ўрнини банкдаги ҳисоб рақамлари эгаллаган. Абидал каби футболчилар эса ҳар доим мухлисларнинг ёдида қолади. Сўз бошида айтганимиздай унинг юраги уришда давом этади. Зеро ўлим билан юзлашган инсонни енгиш қийин!