Маҳачқалъанинг «Анжи» клуби ҳамда Ўзбекистон терма жамоаси ярим ҳимоячиси Одил Аҳмедов фаолиятини Россиянинг «Краснодар»жамоасида давом эттиради. Бу ҳақда «Известия» хабар бермоқда.
"Краснодар" хўжайини Сергей Галицкий ёзда Аҳмедовни сотиб олишга ҳаракат қилганди. Аммо томонлар футболчининг нархи борасида бир қарорга кела олишмаганди. Боз устига, Одилнинг ўзи ҳам Махачқалъада қолишни лозим топганди. Бу сафар эса жамоалар футболчининг трансферини 11 миллион еврога келишишган.
Краснодарликлар бош мураббийи Олег Кононой мавсумнинг баҳорги қисми учун жамоанинг марказий қисмида Павел Мамаев, Юрий Газинский ва Одил Аҳмедовдан иборат кучли "мушт" ташкил қилмоқчи. Бундан ташқари жамоа марказий ҳимоячи ҳам қидирмоқда.
Таъкидлаш лозим, Аҳмедов "Анжи"да қолган жамоанинг юлдузли таркибидаги энг сўнгги футболчидир. Қишки трансфер пайтида эса ўтган йили бронза медалларини қўлга киритган таркибдан ҳеч ким қолмайди. Клубда фақат маҳаллий футболчилар қолишади. Ўзбекистон терма жамоаси ярим ҳимоячисидан ташқари қишда Ласина Траоре "Монако"га ўтмоқда, Жусилей Бразилияга қайтмоқда, Андрей Ешенко эса Москва жамоаларидан бирига ўтиши кутилмоқда.
