Бугун ЎФФда олий лигага қуръа ташлаш маросими ўтказилганини хабар қилгандик. Қуръага кўра “Андижон” жамоаси 1-турни ўз майдонида “Пахтакор”га қарши ўтказади. Маросим якунлангач жамоа бош мураббийи Азамат Абдураимовдан қуръа ҳақидаги фикрларини сўрадик.

"Албатта, биринчи турдаёқ кучли рақибга қарши ўйнаш осон эмас. “Пахтакор” мамлакатимизнинг етакчи клуби саналади. Аммо бошқа томондан олиб қараганда, биринчи учрашувни ўз майдонингда ўтказиш яхши. Чемпионатнинг очилиш учрашувида стадионимиз мухлислар билан тўлади деб ўйлайман. Стадионга қанча кўп томошабин кириб бизни қўллаб-қувватлашса, футболчилар учун далда бўлади. Тўғри, биринчи ўйин ҳамиша қийин кечади. Чемпионатни қандай ўтказиш биринчи учрашувга боғлиқ бўлади. Шу боис мавсумни яхши кайфиятда бошлашга ҳаракат қиламиз. Бунинг учун эса мавсумга ҳозирдан икки баробар куч билан тайёргарлик кўришимиз керак. Умуман олганда қуръадан кўнглим тўлди".