Россиянинг Сочи шаҳрида ўтказиладиган 2014 йилги Олимпиада ўйинларида иштирок этадиган қозоғистонлик спортчиларнинг либослари тақдимоти ўтказилди. Tengrinews.kz хабарига кўра, бир спортчи учун мўлжалланган спорт либослари тўплами нархи 2,3 минг доллар туради.

Қозоғистон олимпиячиларининг спорт либослари тўпламидан жами 25 номдаги маҳсулот киритилган бўлиб, улар орасида байрамона либос (парадга оид форма), машғулот либоси, қалпоқ, шарф, термо ички кўйлак, свитер ва бошқалар ўрин олган.

Қозоғистонлик спортчиларнинг Сочидаги Олимпиадада киядиган либосларида мамлакат байроғи ранглари акс этган, дизайнида эса тарихий анъаналарга мурожаат қилинган. Vesti.kz’нинг ёзишича, либос дизайнида, шунингдек, Қозоғистон ҳудудидан топилган қадимий ёдгорликлар – петроглифлар, тошга чизилган суратлар, ёзувларга оид мотивлардан ҳам фойдаланилган.

Бундан ташқари, спорт либосларига безак беришда ўша даврга оид деворий суратларга кўп учрайдиган тимсоллар – буқа, барс, боши қуёшли жониворлар, от минган кишилар ва бошқалардан ҳам фойдаланилган. Олимпиячиларнинг спорт либослари дизайнини ишлаб чиқишдан аввал Қозоғистоннинг етакчи тарихчилари билан маслаҳатлашилган.

Эслатиб ўтамиз, Сочидаги 2014 йилги Олимпиада ўйинлари 7-23 февраль кунлари бўлиб ўтади.