Ёш боксчиларимиз Озарбайжон ва Қозоғистонда ўтган халқаро турнирларда муваффақиятли иштирок этиб, мамлакатимиз олимпиячилари захираси кучли спортчилар билан бойиб бораётганини кўрсатди.
Боку шаҳрида ёшлар ўртасида ўтказилган анъанавий халқаро турнирда учта олтин, битта кумуш ва учта бронза медаль жамғарган Ўзбекистон ёшлар терма жамоаси умумжамоа ҳисобида иккинчи ўринни эгаллади.
69 килограмм вазн тоифасида рингга чиққан ҳамюртимиз Бектемир Мелиқўзиев саралаш баҳсларида қозоғистонлик Даулет Каби, украиналик Алексей Токарчук, озарбайжонлик Роман Зокиров ва финалда россиялик Гусейн Гусеиновни мағлубиятга учратиб, шоҳсупанинг энг юқори поғонасига кўтарилди.
Терма жамоамиз аъзоларидан Маҳмуд Ғоипов ва Иқболжон Холдоров олтин, Музаффар Рашидов кумуш, Асилбек Солиев, Козим Камронов ва Беҳзодбек Турсунбоев бронза медални қўлга киритди.
Қозоғистондаги халқаро турнирда ёш боксчиларимиз иккита олтин, битта кумуш ва бешта бронза медаль жамғариб, умумжамоа ҳисобида кучли учликдан жой олди. Ўзбек бокс мактаби тарбияланувчиларидан Азизбек Шукуров ва Жасур Аҳмаджонов олтин медални қўлга киритди.
Мусобақада Суннатулла Баҳодиров кумуш, Шоҳруҳ Эркинов, Асқаржон Авазов, Фазлиддин Мелибоев, Жавоҳир Каримов ва Сулаймон Латипов бронза медаль соҳиби бўлди.
