Ёшлар ўртасида Осиё чемпионатининг "D" гуруҳида бугун чорак финалга чиқадиган иккинчи йўлланма эгаси номи маълум бўлади. Ушбу йўлланмага Ўзбекистон ва Саудия Арабистони терма жамоалари даъвогарлик қилишмоқда. Ушбу ўйин олдидан саудияликлар бош мураббийи Холид Абдулраҳмон ал-Короний ўз фикрларини билдириб ўтди.
"Мен Ўзбекистоннинг Хитойга қарши ўйини ва Ироқ билан учрашувининг иккинчи бўлимини томоша қилдим. Ўзбекистон кучли жамоа. Бу жамоа ёшлар ўртасидаги ЖЧда ҳам яхши иштирок этган. Бу жамоа ҳақида тасаввурга эгамиз. Биз ўз мақсадимизга эришиш учун жипслашган ҳолда ўйнашимиз лозим. Биз фақат ғалаба учун ўйнашимиз керак, Ўзбекистонни эса дуранг натижа ҳам қаноатлантиради. Бу ҳолат бизга босим ўтказади.
Лекин мен шогирдларимга тўла ишонаман. Футболчиларимизнинг техник имкониятлари Ўзбекистоннинг кучсиз жиҳатидан фойдаланишга имкон беради. Ўзбекистон Ироқ билан ўйинда ютқазган бўлса-да, улар айниқса иккинчи бўлимда яхши ўйнашди. Лекин биз ғалаба қозониб, чорак финалга чиқмоқчимиз", дейди Холид.
Эслатиб ўтамиз, Ўзбекистон ва Саудия Арабистони ёшлар терма жамоалари ўртасидаги учрашув бугун соат 21:00да бошланади.
