“Шўртан” футбол клуби бош директори Облаёр Расулов расмий баёнот беради:

“2014 йилги футбол мавсумига катта умидлар ва режалар тайёргарлик кўраётган “Шўртан” футбол клуби ҳозирги пайтда қийин аҳволга тушиб қолди. Жамоамизнинг бош ҳомийси — “Шўртаннефтегаз” унитар шўъба корхонаси раисининг молиявий ишлари бўйича ўринбосари, шу билан биргаликда “Шўртан” клуби президенти вазифасини бажарувчи Наврўз Абдураҳмонов клубни молиявий таъминлашдан бош тортмоқда. Бу орқали Н.Абдураҳмонов давлатимиз раҳбари томонидан футболга берилаётган эътибор, “Шўртан” футбол клубида яратилган шароитлар, қурилган иншоот ва базаларга қарамай, “бизга футбол керакмас” қабилида иш тутмоқда. 2013 йилнинг август ойидан бошлаб клуб ходимлари ва футболчиларга ойлик маошлар бўйича маблағ ажратилмаган. Натижада “Шўртан” жамоасининг инқирозга юз тутишига, жамоанинг йўқолиб боришига “Шўртан нефтегаз” УШК раиси ўринбосари сабабчи бўлмоқда.

Ваҳоланки, бизнинг 2014 йилги мавсумдан мақсадларимиз улуғ. Сифатли ўйин кўрсатиб, келаси йили Олий лига қайтиш вазифасини клуб олдига қўйганмиз. Ўтган йили “Шўртан-леди” жамоамиз ҳам аёллар биринчилигида яхши иштирок этиб, 4-ўринни эгаллади. Улар ҳам асосий таркибимиз каби мавсум тараддудини бошлаб юборишган. 

Шунингдек, Ўзбекистон Саноат қурилиш банкининг Қашқадарё филиали ҳам клубимиз раҳбариятининг ходимларга иш ҳақи тўлаш борасидаги кўрсатмасини инкор қилган ҳолда, ўзимизнинг банкдаги ҳисоб-рақамида мавжуд маблағларни беришдан бош тортмоқда.

Юзага келган вазият юзасидан Ўзбекистон футбол федерацияси эътиборини тортишни истардик”.

Шўртан ПФК матбуот хизмати.