Уммонда давом этаётган 22 ёшгача бўлган футболчилар ўртасидаги Осиё чемпионатининг Япония ва Австралия жамоалари ўртасидаги "С" гуруҳи баҳси фаол ўйин вақти 60 дақиқадан ошган дастлабки учрашув бўлди. Бу ОФКнинг "60 дақиқа — Тўхтама! Ўйна!" кампаниясининг асосий мақсадидар.

Япония Австралияни 4:0 ҳисобида мағлуб этган ўйинда тўп 64 дақиқаю 20 сония давомида ўйинда бўлган. Куннинг иккинчи баҳси — Хитой ва Ироқ ўртасидаги ўйин эса янги рекордни ўрнатди — 67 дақиқаю 37 сония. Бу ўйинда Ироқ 1:0 ҳисобида ғалаба қозониб, гуруҳда 100 фоизли натижа кўрсатди.

Эрон ва Кувайт ўртасидаги учрашувнинг фаол ўйин вақти ҳам 60 дақиқага яқинлашди — 59 дақиқаю 29 сония. Шунингдек, Ўзбекистон ва Саудия Арабистони жамоалари ўртасидаги тўқнашувнинг фаол ўйин вақти 57 дақиқаю 12 сониядан иборат бўлди. Бу Ўзбекистон термаси иштирокидаги ўйинларда қайд этилган энг юқори кўрсаткич бўлди.

Гуруҳ баҳсларида ўртача фаол ўйин вақти 54 дақиқаю 36 сонияни ташкил қилган бўлса, бу борада энг паст кўрсаткич Иордания - Уммон ўйинида қайд этилди — 46 дақиқаю 19 сония.

ОФК ҳар бир учрашувдаги фаол ўйин вақтини 60 дақиқадан оширишга ҳаракат қилмоқда. Ушбу кампания келаси йили Австралияда бўладиган Осиё кубогида ҳам давом эттирилади.