Суҳробни биз, «Бухоро» мухлислари ёшлигидан яхши биламиз. Ўз кўз остимизда ўсиб-улғайган, катта футболга қадам қўйган маҳаллий футболчимиз “Насаф”га ўтганида бухоролик мухлислар ҳеч қандай қаршилик билдирмай, унга омад тилаб кузатиб қўйган эдик. Буни олдинга ташланган қадам деб баҳолаб ўзимизни овутган эдик. Ҳатто “Насаф” таркибида «Бухоро» дарвозасига пенальтидан гол уриб, хурсандчилик билан нишонлаганида ҳам мардларча чидадик, фаолиятига омадлар тиладик.
Яқинда Суҳробни жамоамизга қайдганини эшитиб, барча бухоролик мухлисларга келажакка бўлган қандайдир умид уйғонди. Ҳар ҳолда жамоани, маҳаллий ёшларни ўз ортидан эргаштира оладиган жамоамизнинг собиқ сардори қайтгани барча мухлисларга жамоага бўлган умидни қайта уйғотганди.
Аммо яқинда чиққан хабар барча жамоамиз мухлисларини карахт аҳволга солиб қўйди. Суҳроб “Қизилқум”га ўтаётган эмиш. Норасмий хабарларга қараганда, маблағ борасида «Бухоро» раҳбарияти билан келиша олмапти. Наҳотки минглаб мухлисларни қўллаб-қувватлашию ўз вилояти жамоаси шундай оғир аҳволда бўлганида арзимаган пул учун қўшни вилоят жамоасига ўйнаш шунчалик осон бўлса?
Бундай қарорга келаётганингда биз мухлисларни ўйламадингми, Суҳроб? Сени катта футболга олиб кирган жамоангга, мухлисларга, шу жамоага мухлислик қилаётган ота-онанг, ака-укангга ҳурматинг шуми? “Қизилқум” «Бухоро»дан қанча кўп пул тўларкан?
Фақат айбни футболчига ағдараяпмизу, лекин «Бухоро» ФК раҳбарияти, матбуот хизмати, маҳаллий журналистлар мухлисларга нега футболчиларнинг келиб-кетиши ҳақида аниқ асосли фикр билдирмаяптилар? Футболни ким учун ўйнатяптилар?
Бу саволларга икки томондан ҳам расмий жавоб кутиб қоламиз.
Суҳробга мухлислар талаби шуки, агар бухоролик мухлисларнинг унинг олдида заррача ҳурмати бўлса ёки «Бухоро» ФКга қайтсин ёки чемпионатимизнинг кучли учлик жамоаларига ўтсин. Кучли чемпионатларда легионер бўлишини эса орзу қилиб қоламиз. Акс ҳолда унга бўлган ҳурматимиз йўқолади.
Ишонамизки, Суҳроб жамоамизга қайтади ва клуб раҳбарияти ҳам бу борада тегишли ишларни амалга оширади.
Акбар Халимов (43 нафар жамоанинг содиқ мухлислари номидан)
salom87@inbox.uz
