Италияга жўнаб кетиш олдидан Илҳом Мўминжонов шогирдлари охирги назорат ўйинида ғалаба қозонишди.

"Коппа Карневале"да иштирок этадиган "Пахтакор" ёшлар жамоаси "Чилонзор" стадионида Ғузорнинг "Шўртан" клубини 4:2 ҳисобида мағлубиятга учратди. Биринчи бўлим тенг курашлар остида кечиб, рақиблар ҳисобни очишди. "Пахтакор" аъзоларининг ҳаракатлари эса унчалик қовушмади. Лекин танаффусдан сўнг Мўминжонов жамоаси суръатни ошириб, рақибни кескин ҳужумлар билан шошириб қўйди. Тез орада Сиддиқовга ишлатилган қўполлик учун белгиланган пенальтидан Махситалиев унумли фойдаланди. Орадан ҳеч қанча ўтмасдан Иззатилла Абдуллаев меҳмонлар посбонини доғда қолдирди. Кейин ғузорликлар мувозанатни тиклашди.

Охирги 15 дақиқаликда эса ёшларимиз яна икки пенальти тепиш имкониятига эга бўлишди. Рақиб ҳимоячиларининг ўта қўпол ҳаракатларидан кейин Махситалиев ҳар икки жарима зарбасидан тўп киритди. Шундай қилиб, ёшлар жамоаси учрашувда зафар қучди.

"Пахтакор" - "Шўртан" - 4:2 (0:1)
Голлар: Махситалиев 3та, Иззатилла Абдуллаев.
"Пахтакор": Эргашев, Толипов, Иброҳим Абдуллаев, Убайдуллаев, Комилов, Болтабоев, Соҳибов, Темур Ҳакимов, Сиддиқов, Махситалиев, Жасур Ҳакимов.
Захирадан тушганлар: Талгатов, Иззатилла Абдуллаев, Сидоров.