Ўзбекистон Республикаси Маданият ва спорт ишлари вазирлиги томонидан ёшлар камолотида жисмоний тарбия ва спортнинг ўрни ва уни янада ривожлантириш истиқболлари мавзусида илмий-амалий анжуман ўтказилди. Бу ҳақда ЎзА хабар бермоқда.

Президентимиз Ислом Каримов раислигида жорий йил 28 январь куни Оқсаройда бўлиб ўтган Ўзбекистон Болалар спортини ривожлантириш жамғармаси Ҳомийлик кенгашининг навбатдаги йиғилишида белгилаб берилган вазифалар ижроси юзасидан ташкил этилган тадбирда тегишли вазирлик ва идоралар вакиллари, мураббий ва мутахассислар, спорт жамоатчилиги, оммавий ахборот воситалари ходимлари иштирок этди.

ЎзАнинг қайд этишича, мамлакатимизда бир ярим мингдан зиёд болалар спорти объекти фарзандларимиз ихтиёрида бўлиб, бугун 2 миллионга яқин бола спортнинг 30 дан зиёд тури билан мунтазам шуғулланмоқда. Спортчиларимиз 2013 йилги спорт мавсумида халқаро мусобақаларда 276 олтин, 250 кумуш ва 268 бронза медалига сазовор бўлган.