Ўзбекистон спорт делегациясининг дастлабки гуруҳи бугун тонгда ХХII Қишки Олимпиада ўйинлари ўтказилувчи Сочи шаҳрига етиб борди. 5 февраль куни Тошкент вақти билан соат 17.00да эса Олимпиада қишлоғида Ўзбекистон байроғини кўтаришга бағишланган тантанали тадбир бўлиб ўтади. 7-23 февраль кунлари ўтказиладиган Олимпия ўйинларида уч нафар спортчимиз – Миша Ге музда нафис учиш, Артем Воронов ва Ксения Григорьева эса слалом ва гигант слалом баҳсларида иштирок этади. Евгений Рохин эса ҳакам сифатида мусобақага таклиф этилган. Бундан ташқари, паралимпиячиларимиз илк бор қишки паралимпия ўйинларида қатнашади. 7-16 март кунлари бўлиб ўтадиган XI Паралимпия ўйинларида Евгений Слепов сноуборд, Рамил Гаязов эса тоғ чанғисида Ватанимиз шарафини ҳимоя қилади.

Кеча Сочидаги олимпия қишлоғи дастлабки спорт делегацияларини қабул қилиб олди. Биринчилардан бўлиб Янги Зеландия, Япония, Мўғулистон, Бельгия ва Филиппин спорт делегациялари Сочига етиб келишди. Россия терма жамоаси эса 5 февраль куни олимпия қишлоғига келиб жойлашади. Мезбон делегация таркиби спортчилар, мураббийлар хамда расмий шахсларни қўшиб хисоблаганда 140 кишидан иборат. Умуман олганда, Оқ олимпиадада дунёнинг 85 мамлакатидан 6000 дан зиёд спортчи иштирок этиши кутилмоқда.