Бугун "Оқ-тепа" клубининг навбатдан ташқари йиғилиши бўлиб ўтди. Йиғилишда клуб президенти Сарвар Шоғуломов, мураббийлар штабида фаолият кўрсатаётган мутахассислар ва футболчилар иштирок этди. Сарвар Ғанишерович сўзга чиқар экан, бугундан клубда янги бош мураббий иш бошлашини таъкидлаб, жамоа аъзоларига Александр Мочиновни бош мураббий сифатида таништирди.

Ўз навбатида Александр Владимирович ҳам “Оқ-тепа” ўз олдига улкан мақсадлар қўяётганини, бунинг учун барчадан ўз ишига жиддий тарзда ёндошиш талаб қилинишини таъкидлаб ўтди. Қолаверса, айни вақтда жамоада бўлиб турган ҳеч бир футболчига асосий таркибдан жой нақд эмаслигини, бунинг учун машғулотларда тинимсиз ишлаш лозимлигини уқтирди.

Мураббийлар штабида Александр Мочиновга Анатолий Курлаев, Александр Токов, дарвозабонлар мураббий Олег Хожиохунов ва жисмоний тайёргарлик бўйича мураббий Азиз Муҳамедов ёрдам беради. Александр Владимирович эртага жамоадаги биринчи машғулотини ўтказади.