Шу йил ёзда Бразилияда бўлиб ўтадиган Мундиал баҳсларининг очилиш маросими ҳақида баъзи маълумотлар пайдо бўлди. Чемпионатнинг илк ўйинида оёғи фалаж ўсмир тўпни ўйинга киритиб бериши билан ЖЧ-2014га старт берилади, деб ёзади Daryo.
Юра олмайдиган ўсмир тўпни махсус экзоскелет ёрдамида тепади. Мазкур ташқи механик скелет бош мия сигналлари воситасида тананинг пастки қисмини ҳаракатлантиради. Мия тўлқинларини дастлаб бошга (ёки ҳатто бош чаноғи ичига) ўрнатилган датчиклар қабул қилиб олади, кейин уларни симсиз тарзда экзоскелетга узатади. Экзоскелет ҳар бир сигналга бўйсуниб, мия буюрган ҳаракатларни бажаради.
Чемпионат ташкилотчилари тўпни илк бора рамзий тарзда тепиб, ўйинни бошлаб берадиган ўсмир ким бўлишини ҳозирча аниқлаштирганлари йўқ. Айни пайтда бир гуруҳ шифокорлар ўнлаб ўсмирларга экзоскелетдан фойдаланишни ўргатишмоқда. Чемпионатни очиб берадиган номзод очилиш маросимига яқин аниқланади.
Мундиалнинг илк ўйини 12-июн куни Сан-Паулуда, Бразилия ва Хорватия терма жамоалари ўртасида бўлиб ўтади.
Экзоскелет Дюк университети (АҚШ), Мюнхен техника университети (Германия) ва Лозанна Федерал технологик институти (Швейсария) олимларидан иборат халқаро гуруҳ томонидан тайёрланмоқда.
