Сочи-2014 Қишки Олимпия ўйинларининг расмий сайтида ўзбекистонлик спортчиларни қўллаб-қувватлаш мумкин. Ҳозирги вақтда 5 минг мартадан ортиқ қўллаб-қувватланган Ўзбекистон олимпия терма жамоаси рейтингда 3-ўринда турибди.

Олимпия терма жамоаларини қуйидаги ҳавола (www.sochi2014.com/podderzhi-stranu) орқали ўтиб, Facebook, «ВКонтакте» ёки Twitter тугмаларини босган ҳолда қўллаб-қувватлаш мумкин. Ҳозирги вақтда рейтингда 13 мингдан кўпроқ овоз олган Мўғулистон ва 10 мингдан кўп марта қўллаб-қувватланган Россия терма жамоалари бошқариб бормоқда.

Ўзбекистон олимпия терма жамоаси Сочидаги Ўйинларда уч нафар спортчи билан иштирок этмоқда. Олимпиада очилиш маросимида Ўзбекистон байроғини кўтариб чиққан Ксения Григорьева, шунингдек, Артём Воронов чанғи учиш баҳсларида Ўзбекистон шарафини ҳимоя қилса, Миша Ге фигурали учиш баҳсларида ғолиблик учун кураш олиб боради.

Ўзбекистонлик спортчиларнинг Сочи-2014даги юришини айнан Миша Ге 13 февраль куни бошлаб беради. Шу куни Тошкент вақти билан соат 20:00да Миша Ге фигурали учиш бўйича эркаклар ўртасидаги қисқа дастур доирасида чиқиш қилади.