Россиянинг Сочи шаҳрида кечаётган Қишки Олимпиада таркибидан ўрин олган тоғ чанғисида тез учиш мусобақасида бирваракайига икки спортчи ғолиб бўлди. Шу сабабли Сочида зудлик билан (24 соат ичида) қўшимча олтин медал тайёрлашга тўғри келди.

Улар 13-феврал куни ғолибалар – словениялик Тине Мазе ҳамда швейсариялик Доминик Гизинларга топширилади, дея хабар беради Олимпия ўйинлари расмий сайти.

Сочи Олимпиадаси медалларини ишлаб чиқарувчи “Адамас” компанияси ижрочи директори Максим Вайнберг сўзларига кўра, зудлик билан қўшимча медал тайёрлаш зарурати туғилиб қолишини инобатга олган ҳолда, Сочида кўчма ишлаб чиқариш мажмуаси яратилган.

Дастлаб Олимпиада арафасида бир неча дона қўшимча медал тайёрлаб қўйилган, фақат уларга спорт тури белгилари туширилмаган. Қўшимча ишлов бериш ҳам камида 15 соат вақт талаб этади. Сочидаги ўйинлар тугагач, ишлатилмаган ярим тайёр медаллар турли музейларга, жумладан, Лозаннадаги Олимпия музейига тақдим этилади.

Мазе ва Гизин мутлақо бир хил – бир дақиқаю 41,57 сония натижани қайд этишган. Олимпиадалар тарихида спортнинг тоғ чанғисида тез тушиш тури бўйича илк бор шу сафар олтин медални бир ё‘ла икки нафар спортчи ютиб олди.

Шунингдек, ушбу медал қишки Олимпия ўйинлари тарихидаги Словениянинг биринчи олтин медалидир.