"Бунёдкор"га қарши ўйин олдидан "Ал-Фатҳ" клуби президенти Абдул Азиз жамоа мусобақадаги дебютидаёқ илк ғалабани қўлга киритиши, натижада 3 очко билан ажойиб старт олишлари, бу эса уларга кейинги ўйинларга яхши туртки беришига ишонаётганини таъкидлади.

Абдулазиз Афалақнинг таъкидлашича, "Бунёдкор"га қарши ўйин улар учун осон кечмайди, аммо араблар техник ва психологик томондан, умуман, барча жиҳатлар бўйича ўйинга тайёр. Жамоанинг учрашувдан мақсади ҳам шу - фақат ғалаба.

- Жамоамиз ўз мухлислари қаршисида тўп суради. Бу нарса бизга босим юклаши мумкин. Аммо ҳар қандай ҳолда ҳам фақат ғалаба учун ўйнаймиз. Ахир биз бу кунларни 5-6 йил кутдик, - дея клубнинг Саудия Арабистони олий лигасига чиққанига 6 йил бўлганини эслатади Афалақ.

- Бизда аниқ режалар бор. Бу эса муваффақиятларимизнинг сабаби бўлиб келмоқда. Унда ҳам футболчилар ва ҳам мураббийларга керакли барча шароитларни яратиш кўзда тутилган. Шу сабаб мавсум якунида техник ҳисоботга эҳтиёж бўлмайди: биз мураббий билан барчасини - жамоанинг кучли ва кучсиз томонларини муҳокама этамиз. - дея таъкидлайди "Ал-Фатҳ" президенти.

Абдулазиз Афалақ ўз интервьюсида "Бунёдкор" клубига юқори баҳо берган:

- Табиатан рақиблар ҳақида кўп гапиришни ёқтирмайман. Айтишим мумкинки, бизнинг рақибимиз - буюк жамоа, бу турнирда катта тажрибага эга. Сабаби бу сафарги ОЧЛ улар учун ҳисоб бўйича  еттинчиси бўлади.