Кеча назорат баҳсида "Пахтакор" "Ротор"га 1:4 ҳисобида имкониятни бой берди. Мазкур баҳсда мураббийлар штаби асосан ёш футболчиларни синаб кўришга қарор қилди.
Асосий таркиб шундай кўриниш олди:
Рибкин, Махситалиев, Убайдуллаев, Рогованов, Ҳакимов, Юсупов, Фернандес, Толипов, Солиев, Бабаян, Андреев.
Биринчи бўлимда волгоградликлар Аппаев киритган тўп эвазига олдинга ўтиб олишди. Рилов иккинчи бўлим бошида орадаги фарқни оширган бўлса, захирадан ўйинга қўшилган Сергеев ҳисобни қисқартирди. Бироқ шундан кейин "Ротор" футболчилари яна икки бор тўп киритишди. Малигин ва Кабутов урган голлар учрашувнинг 4:1 ҳисобида якунига етишини таъминлади. Шу тариқа беллашув рақибнинг йирик ҳисобдаги ютуғи билан тугади.
"Пахтакор" Туркиядаги йиғин доирасида кейинги назорат баҳсини 28 февраль куни Краснодарнинг "Кубань" клубига қарши ўтказади.
