Ўзбекистон спортининг кўзгуси ҳисобланган Олимпия шон-шуҳрати музейида халқаро майдонларда Ватанимиз шарафини муносиб ҳимоя қилиб, юксак натижаларни қўлга киритаётган мардонавор спортчиларимизни тақдирлаш маросимларини ўтказиш яхши анъанага айланган.

Бугун ушбу музейда куни-кеча Бирлашган Араб Амирликларининг Дубай шаҳрида енгил атлетика бўйича ўтказилган Гран-При туркумига кирувчи йирик мусобақада 8 та олтин ҳамда 3 та бронза медалига сазовор бўлиб, жорий йил Инчеон шаҳрида ўтказиладиган ПараОсиё ўйинларига бир йўла 7 та йўлланмани қўлга киритган мамлакатимиз паралимпиячиларини тақдирлашга бағишланган тадбир ўтказилади. Бундан ташқари мазкур тадбирга Россиянинг Сочи шаҳрида бўлиб ўтган XXII қишки Олимпиада ўйинларининг очилиш ва ёпилиш маросимларида Ватанимиз байроғини стадион узра олиб ўтиш бахтига муяссар бўлган тажрибали спортчимиз, “Сочи-2014” ўйинларининг энг гўзал спортчиларидан бири Ксения Григорьевани ҳам таклиф этилган.

Маълумки, Олимпиада ўйинлари ниҳоясига етгач, орадан икки ҳафта ўтиб Паралимпия ўйинларига старт берилади. 7-16 март кунлари Сочи шаҳрида ўтказиладиган XI қишки Паралимпия ўйинларида биринчи маротаба мамлакатимиз спортчилари ҳам ғолиблик учун курашга киришадилар. Бугунги тадбирда Паралимпия ўйинларига йўл оладиган мамлакатимиз делегацияси аъзолари ҳам иштирок этадилар.

Спортчиларимизни тақдирлашга бағишланиб ўтказиладиган тадбир соат 16:00да бошланади.