Икки кун олдин Эрон - Қувайт учрашуви билан бошланган Осиё чемпионати - 2015 саралашида сўнгги тур бугун ниҳоясига етади. Ҳозирга келиб деярли барча гуруҳларда яққол етакчилар ажралиб бўлган. Биргина "С" гуруҳида учинчи ўриндаги Ироқ ўзидан олдин турган Хитойга етиб олиши мумкин. Қуйида ОФК расмий сайтининг қисқача тур превьюси билан танишинг.

Ироқ - Хитой
Сўнгги турнинг марказий баҳсида "С" гуруҳининг иккинчи ўрини соҳиби аниқланади. Гуруҳда Саудия Арабистони 13 очко билан яққол пешқадам. Хитой терма жамоаси ҳисобида 8 очко бор, Ироқда эса 6та. Шу боис меҳмонларни дуранг ҳам қониқтирса, мезбонларга фақат уч очко керак. Аммо иккала жамоа ҳам энг яхши учинчи ўрин соҳиби бўлиш учун яхши имкониятга эга.  Бироқ уларнинг ҳеч бири бошқа жамоаларнинг натижаларига қараб ўтиришни истамаслиги кундай равшан.

Ушбу ўйиннинг яна бир аҳамиятли томони шундаки, яқинда Хитой термасига Алайн Перрни бош мураббий этиб тайинланган. Аввалроқ Марсел, Портсмут, Сент-Этьен ва Лион шаҳарларида ишлаган мураббий терма жамоасини дебют ўйинидаёқ йирик мусобақага олиб чиқиш ниятида.

Унинг ҳамкасби, Ироқ терма жамоаси устози Ҳаким Шокир эса яқинда 22 ёшгача футболчилар ўртасида Осиё чемпионатида иштирок этганди. "Биз Осиёнинг собиқ чемпионларимиз, шундай экан Австралияга бориш учун қўлимиздан келганча ҳаракат қилишимиз керак, - деди у, - биз ўйинга жиддий тайёргарлик кўряпмиз. Жамоада яхши ўйинчилар кўп".

Таиланд - Ливан
Илк учрашувда 5:2 ҳисобида устун келган Ливан агар ОКдан умиди бўлса, рейтинг жиҳатдан ўзидан пастроқ бўлган рақибини енгиши шарт. Шунда ҳам агар гуруҳнинг нариги ўйинида Ироқ Хитойни мағлуб этишнинг уддасидан чиқса, у ҳолда ливанликлар иккинчи ўрин учун имкониятни йўқотишади ва ҳамда энг яхши учинчи ўрин соҳиби сифатида Австралияга боришлари учун олти голли фарқ билан ғалаба қозонишларига тўғри келади. Агар жамоа Австралияга йўл олса, бу улар учун иккинчи қитьа чемпионати бўлади. Илк марта жамоа 2000 йилда, мусобақа мезбони бўлгани учун қатнашганди.

Сурия - Иордания
Иордания аллақачон кейинги босқичга чиқиб бўлган. Уммонда 11, иорданларда 9 очко бор. Сурия эса 4 очкоси билан фақат ғалаба қозонишга мажбур. Шунда ҳам иложи борича йирикроқ ғалаба ва нариги гуруҳда Ироқ ва Ливаннинг мағлубиятга учраши ҳисобига кенгурулар юртига боришлари мумкин. Очиғини айтганда, жамоа ОКни яна 4 йил кутадиган кўринади.

Бошқа тўқнашувлар
Малайзия терма жамоасида ҳам 4 очко бор. Баҳрайн ва Қатар гуруҳ ғолиби номини аниқлаш учун майдонга тушса, Малайзия ўзидан кейин очкосиз бораётган Яманга иложи борича кўпроқ гол уришга ва очколари сонини 7тага етказишга ҳаракат қилади.

Худди шундай вазият бизнинг гуруҳда ҳам кузатилмоқда. Бу борада Сизга барчаси маълум. 4 очкога эга Гонгконг очкосиз Вьетнамга сафар қилади (умуман олганда, сўнгги тур баҳсларида кураш асосан 21-йўлланма учун кечади). Саралашда юз фоизлик натижа кўрсатиш имконияти ҳозирча фақат БАА терма жамоаси сақланиб қолган.

ОСИЁ КУБОГИ - 2015 саралаши
"А" гуруҳи
Уммон - Сингапур
Иордания - Сурия

"В" гуруҳи
Эрон - Қувайт
Таиланд - Ливан

"С" гуруҳи
Ироқ - Хитой
Саудия Арабистони - Индонезия

"D" гуруҳи
Яман - Малайзия
Қатар - Баҳрайн

"E" гуруҳи
Ўзбекистон - БАА
Вьетнам - Гонгконг