Кеча «Поханг Стилерз» - «Улсан Хёндэ” ўйини билан старт олган Жанубий Корея Кей-лигаси бугун давом эттирилди. Ўзбекистон терма жамоаси сардори Сервер Жепаров фаолият олиб борадиган «Сеонгнам» клуби 1-турни сафарда «Кёнгнам»га қарши ўтказди.
Мавсумга тайёргарликни Туркияда олиб борган сеонгнамликлар ўйинда устунликка эришган бўлсалар ҳам мағлубият аламини тотишга мажбур бўлдилар. Учрашувни бир хужумчи билан бошлаган «Сеонгнам» сафида Жепаров ҳужумчи ортида тўп сурди. Корея ОАВларига кўра, ҳамюртимиз учрашувда бир қанча узатмалари билан «Сеонгнам»нинг ҳужум чизиғини тўп билан таъминлаб турди. Сервер Жепаров 82-дақиқада ўз ўрнини Ким Сонг Жунга бўшатиб берди.
Учрашув якунланишига икки дақиқа қолганида Кёнгнамнинг австралиялик химоячиси Люк Девере томонидан киритилган ягона гол майдон эгаларига мавсумдаги илк ғалабани олиб келди. Кей-лиганинг кеча ва бугун бўлиб ўтган ўйинларида қуйидаги натижалар қайд этилган:
Поханг Стилерз - Ульсан Хёндэ - 0:1
Чонбук - Бусан - 3:0
Сеул - Чуннам - 0:1
Кёнгнам - Сеонгнам - 1:0
Сангжу - Инчеон 2:2
Жежу Юнайтед - Сувон 0:1
Отабeк Йўлдошeв
Жанубий Корея, Сеул
