"Бавария" бош мураббийи Хосеп Гвардиола ЕЧЛнинг нимчорак финал жавоб учрашувида "Арсенал"га қарши ўйин олдидан матбуот анжуманида иштирок этди.

"Агар ўйинни натижани сақлаб қолиш учун шунчаки вақт ўтказиш билан бошласак, албатта, муаммоларга дуч келамиз. Тўпни кўпроқ биз назорат қилишимиз керак.

"Арсенал"ни яхши биламан, улар вазиятни ўнглашлари мумкин. Бизнинг вазифамиз ҳам шу - уларга бу имкониятни бермаслик. Шу боис ўйинни ўз назоратимизга олишимиз керак. Агар тўп бизда бўлса, чорак финал йўлланмаси ҳам бизда қолади. Агар тўпни "Арсенал"га бериб қўйсак, чорак финалга улар чиқишади.

Агар рақиб марказда тўпни эгаллаб олса, у ҳолда барча нарса бўлиши мумкин. Тўпчилар ўз майдонларидаги мағлубиятдан сўнг йўқотадиган нарсалари йўқ. "Арсенал" учун бу ўйин - ҳал қилувчи учрашув. Жамоа аъзолари бор кучларини ишга солишади. Рақибнинг энг кучли ўйинини кўрсатишини кутяпман", - деди Гвардиола.

Эслатиб ўтамиз, "Бавария" - "Арсенал" ўйини бугун тунда 00:45да бошланади.