Таиланднинг Бангсаен шаҳрида оғир атлетика бўйича ёшлар ўртасида ўтказилган Осиё чемпионати баҳслари ниҳоясига етди. Мазкур қитъа чемпионатида Ўзбекистон ёшлар терма жамоаси аъзолари 4 та кумуш ва 6 та бронза медалига сазовор бўлиб, 14 давлат вакиллари орасида иккинчи ўринни эгаллашди.
Терма жамоамиз ҳисобига учта кумуш медални Шерзод Маъруфжонов (-85 кг) келтирди. Истеъдодли спортчимиз даст кўтаришда 111 кг, силтаб кўтаришда 142 кг., умумий 253 кг. натижани қайд этди. Яна бир кумуш медалга Файзулло Набиев (-77 кг) сазовор бўлди. Файзулло даст кўтариш мусобақасида 129 кг. тошни ўзига бўйсинтирди.
Осиё чемпионатининг бронза медаллари Азимжон Ғаниев (-94 кг) ҳамда Зуфар Қодировга (+105 кг) насиб этди. Азимжон Ғаниев даст кўтаришда 135 кг., силтаб кўтаришда эса 170 кг. натижани қайд этиб, умумий 305 кг. натижа билан учта бронза медалига сазовор бўлган бўлса, Зуфар Қодиров даст кўтаришда 140 кг, силтаб кўтаришда 184 кг. тошни ўзига бўйсинтириб, умумий 324 кг. натижа билан учта бронза медали совриндори бўлди.
Ўзбекистон терма жамоаси аъзолари 13 март куни Тошкент вақти билан соат 01:55да Ватанимизга қайтиб келадилар.
