Бугун футбол бўйича 23-миллий чемпионат баҳсларига старт берилади. Мухлислар орзиқиб кутган дамлар ҳам етиб келди, “Андижон” ўз майдонида мамлакатимизнинг 9 карра чемпиони “Пахтакор”ни қабул қилади.

Иккала жамоа ҳам мавсумга яхши тайёргарлик кўрди. Шу билан бирга таркибни ҳам имкониятларига қараб кучайтиришди. “Пахтакор” жамоа негизини сақлаб қолган ҳолда таркибга Егор Кримец ва Камолиддин Тожиев каби собиқ ўйинчиларини қайтарди. "Андижон" эса селекция ишларини кенг қўламда олиб бориб, 10 нафардан ортиқ ўйинчилар билан шартнома имзолади.

Бу жамоаларнинг ўзаро ўйинлари тарихига назар ташлайдиган бўлсак, бугунги ўйин чемпионатдаги 41-баҳс бўлади. Бунгача жамоалар ўзаро 40 марта куч синашишган. Албатта, устунлик "пахтакорчилар" тарафида. Андижонликлар бу рақибни 3 марта мағлубиятга учратишган бўлса, 29та ўйинда имкониятни бой беришган. 8та учрашувда эса кучлар тенг келган.

Учрашув “Соғлом авлод” стадионида соат 16:00да бошланади. Очилиш учрашуви муносабати билан ўйиндан олдин концерт дастури ўтказилади. Барча футбол ишқибозларини эртага “Соғлом авлод” стадионига чорлаймиз.