Кеча Жанубий Корея кей-лигасининг 2-тур ўйинларига старт берилди. Ҳамюртимиз Сервер Жепаров тўп сурадиган “Сеонгнам” бу турда чемпионатнинг кучли клубларидан бири Сеулни ўз уйида қабул қилди.
Муросасиз курашларга бой ўтган учрашув нурсиз дуранг билан якунланди. Ҳайратланарлиси, ўтган турда майдонда анча фаол ҳаракат қилган терма жамоамиз сардори ушбу ўйиннинг ҳаттоки қайдномасига ҳам киритилмади. Бу сафар Жепаровнинг нуқтасида илк дақиқалардан бошлаб жамоага қишда қўшилган бразилиялик Валдивия ҳаракатланди. Бундан ташқари жамоа сардори ва асосий дарвозабони Чон Санг Вук ҳам заявкага киритилмади. Ўйиндан кейинги матбуот анжуманида жамоа бош мураббийи Парк Жонг Хван буни қуйидагича изоҳлади:
"Жепаровдан ранжидим. Махорати бор футболчи умумжамоа учун ҳаракат қилиши ва тезликни сусайтирмаслиги керак. Бугун унинг ўрнида Валдивия ҳаракатланди ва ягона хужумчимиз Ким Донг Соб анча эркин ҳаракатланиш имконига эга бўлди".
Отабeк Йўлдошeв
Жанубий Корeя, Сeул
