Ўзбекистонлик ҳужумчи Даврон Мирзаев Тожикистоннинг "Истиқлол" клуби билан шартнома имзолади. Бу ҳақда клуб расмий сайти хабар тарқатди.

Даврон бугун Тошкент - Олма-ота - Душанбе рейси орқали Тожикистон пойтахтига етиб борди. Шундан сўнг мавсум сўнггига қадар мўлжалланган шартномага имзо чекди. 25 ёшли футболчи жамоанинг ўқув-машғулот базасига йўл олди. У кечки машғулот пайтида жамоа аъзоларига  таништирилди.

Даврон Мирзаев 12 ёшидан бошлаб «Пахтакор» футбол мактабида шуғулланиб келмоқда. Орадан 3 йил ўтиб ўринбосарлар жамоасига қабул қилинган бўлса, кейинчалик Ўзбекистон ўсмирлар терма жамоасидан ҳам таклиф олган. 2006 йили Қозоғистонда ўтказилган халқаро мусобақада "Рубин" селекционерлари эътиборига тушди ва қозонликлар билан шартнома имзолади. 2008 йил Россия кубоги доирасида "Смена" жамоасига қарши ўйинда "Рубин"нинг асосий таркибида дебютини нишонлаган. 2007-2009 йиллар давомида "Рубин" ўринбосарлар ва ёшлар жамоасида 47та ўйинда майдонга тушиб, 12та гол урган. Россия Премьер-лигасидаги дебюсти эса 2009 йилга тўғри келган. "Кубань"га қарши 30-тур ўйинида у захирадан майдонга тушган. Сўнгги 3 мавсумни эса Россия Биринчи дивизиони вакили «Нефтехимик» сафида ўтказди. 2010 йилда эса Ҳамдўстлик кубогини қўлга киритган. Ҳужумчи 2009 йили Мисрда ўтказилган ёшлар ўртасидаги ЖЧ ва 2010 йили Гуанжоуда бўлиб ўтган Осиё ўйинларида қатнашган. Ўзбекистон миллий терма жамоаси сафида 4та ўйинда майдонга тушган.

МАЪЛУМОТ
Даврон Бахтиёрович Мирзаев.
1989 йилнинг 8 февраль куни Тошкентда туғилган.
Бўйи – 183 см, вазни – 73 кг.
Амплуаси – ҳужумчи.
Клубдаги фаолияти:
2007 – 2008 - «Пахтакор» (Тошкент)
2009 - 2010 - «Рубин» (Қозон)
2011 – 2013 «Нефтехимик» (Нижнекамск)